Venskap Stord-Comalapa vart stifta i 1989 som ei arbeidsgruppe innan administrasjonen i Stord kommune. I 1995 vart Venskap Stord-Comalapa ein frivillig organisasjon med eigne vedtekter og eige styre med eit medlem frå Stord kommune.

Dei fyrste åra var kontakt mellom venskapsskular den viktigste kommunikasjonen. Etter kvart vart kontakten utvida til fleire område. Ein av dei mest vellukka gruppene er musikkgruppa med gjensidig vitjing og seminar. Seinast i september 2009 var musikklærarar frå Stord i Comalapa og haldt eit tre dagars seminar med 30 deltakarar frå fleire stader i Guatemala i eit samarbeid med kultur- og undervisningsdepartementa i Guatemala.

Gjennom Vennskap Nord/Sør sitt Elimu-program har Stord vidaregåande skule tatt del i fleire utvekslingar mellom elever og lærarar med skulen Escuela Nacional de Ciencias Comerciales i Comalapa.

Frå 2002 har Stord kommune og Comalapa kommune hatt utveksling av fredskorpsarar. Tema har vore lokaldemokrati- og administrasjon, helse, skule/miljø/biologisk mangfald/bosshandsaming og musikk.. Venskapskomiteane er ei viktig støtte for fredskorpsarane på fritida.

Frå hausten 2009 er ein i gong med den 5. utvekslingsrunden som skal vara i eitt og eit halvt år. Tre ungdommar som representerte Stord reiste til Comalapa i oktober 2009 og arbeidde innan musikk, miljø og førebyggande arbeid for ungdom. I januar 2010 kom to ungdommar frå Comalapa til Stord. Dei arbeidar innan musikk, idrett og førebyggande aktivitetar for ungdom ut skuleåret til juni 2011.

I 2007 vart Stord kommune og Municipalidad de San Juan Comalapa samde om å søkja Kommunenes sentralforbund (KS) om å taka del i det internasjonale kommuneprosjektet MIC (Municipal International Cooperation). I 2008 og 2009 har dei to kommunane samarbeida om bevisstgjering om miljø- og kvinnespørsmål. Målet er å hindre forureining av boss og auka deltaking av kvinner i dei lokale utviklingskomiteane. Stord kommune deltek i MIC-prosjektet  òg i perioden 2010-2012.